Titulus 3

Paulus libro 21 ad edictum Agri civitatium alii vectigales vocantur, alii non. Vectigales vocantur qui in perpetuum locantur, id est hac lege, ut tamdiu pro his vectigal pendatur, quamdiu neque ipsis, qui conduxerint, neque his, qui in locum eorum successerunt, auferri eos liceat: non vectigales sunt, qui ita colendi dantur, ut privatim agros nostros colendos dare solemus.

Qui in perpetuum fundum fruendum conduxerunt a municipibus, quamvis non efficiantur domini, tamen placuit competere eis in rem actionem adversus quemvis possessorem, sed et adversus ipsos municipes,

Ulpianus libro 17 ad Sabinum Ita tamen si vectigal solvant. 6.3.3

Paulus libro 21 ad edictum Idem est et si ad tempus habuerint conductum nec tempus conductionis finitum sit.