Titulus 7

Paulus libro secundo ad edictum Opera in actu consistit nec ante in rerum natura est, quam si dies venit, quo praestanda est, quemadmodum cum stipulamur "quod ex arethusa natum erit".

Ulpianus libro 17 ad edictum Operae servi legatae capitis minutione non amittuntur.

Gaius libro septimo ad edictum provinciale In hominis usu fructu operae sunt et ob operas mercedes.

Gaius libro secundo de liberali contra edictum urbicum Fructus hominis in operis constitit et retro in fructu hominis operae sunt. Et ut in ceteris rebus fructus deductis necessariis impensis intellegitur, ita et in operis servorum.

Terentius Clemens libro 18 ad legem Iuliam et Papiam Operis servi legatis usum datum intellegi et ego didici et Iulianus existimat.

Ulpianus libro 55 ad edictum Cum de servi operis artificis agitur, pro modo restituendae sunt, sed mediastini secundum ministerium: et ita Mela scribit.

Si minor annis quinque vel debilis servus sit vel quis alius, cuius nulla opera esse apud dominum potuit, nulla aestimatio fiet.

Item voluptatis vel affectionis aestimatio non habebitur, veluti si dilexerit eum dominus aut in deliciis habuerit.

Ceterum deductis necessariis impensis fiet aestimatio.