Titulus 39

Imperatores Severus, Antoninus Si in fraudem legatorum transmissam hereditatem ad substitutum probatura es, utilis actio adversus eum, cum quo fraudis consilium participatum est, competit. Plane si pecunia accepta omisit aditionem, legata et fideicommissa praestare cogitur * SEV. ET ANT. AA. IANUARIAE. *<A 196 ACCEPTA K. OCT. DEXTRO II ET PRISCO CONSS.>

Imperator Philippus Eum, qui, cum testamento posset obtinere hereditatem, ab intestato ius successionis voluit amplecti, libertatibus eodem testamento datis obesse non posse iam pridem placuit.

Quod si, cum neque adiri ex testamento hereditas neque bonorum possessio peti possit, iudicium defuncti non usurpabitur, sed ad irritum iuris ratione vocatum est, petitio relictorum nullo iure procedit.

Sin vero iure facto testamento cessante herede scripto alter ab intestato adiit hereditatem, neque libertates neque legata ex testamento posse praestari manifestum est. * PHILIPP. A. ET PHILIPP. C. VICTORIAE. *<A 245 PP. K. IAN. PHILIPPO A. ET TITIANO CONSS.>

Imperatores Diocletianus, Maximianus Si proculina patri vestro, cuius estis heredes, testamento quid reliquit et scripti iure secundum eius iudicium vel omissa causa testamenti successerunt ab intestato, aditus competens iudex, quatenus legis falcidiae modus patitur, vobis relicta restitui iubebit. * DIOCL. ET MAXIM. AA. ET CC. APRO ET PIAE. *<A 293 D. XV K. IAN. SIRMI AA. CONSS.>