Titulus 40

Imperator Alexander Severus. Potest de falso causam cognoscens praeses provinciae incidentem proprietatis quaestionem dirimere. * ALEX. A. IULIANAE. *<A 234 D. VI K. APRIL. MAXIMO II ET URBANO CONSS.>

Imperator Constantinus. Praesides provinciarum oportet, si quis potentiorum extiterit insolentior et ipsi vindicare non possunt aut examinare aut pronuntiare nequeunt, de eius nomine ad nos aut certe ad praetorianae praefecturae scientiam referre : quo provideatur, qualiter publicae disciplinae et laesis tenuioribus consulatur. * CONST. A. AD MAXIMUM. *<A 328 D. IIII K. IAN. TREVIRIS IANUARINO ET IUSTO CONSS.>

Imperator Constantinus. Iustissimos et vigilantissimos iudices publicis adclamationibus collaudandi damus omnibus potestatem, ut honoris eis auctiores proferamus processus, et e contrario iniustos et maleficos querellarum vocibus accusandi, ut censurae nostrae vigor eos absumat. Nam si verae voces sunt nec ad libidinem per clientelas effusae, diligenter investigabimus: praefectis praetorio et comitibus, qui per provincias constituti sunt, provincialium nostrorum voces ad nostram scientiam referentibus. * CONST. A. AD PROVINCIALES. *<A 331 PP. K. NOV. CONSTANTINOPOLI BASSO ET ABLABIO CONSS.>

Imperator Constantinus. In officiales praefectorum cursum publicum laniantes vel prava contra utilitatem publicam molientes vindicandi tibi dedimus potestatem, ita ut praefectos de eorum culpa facias certiores. * CONST. A. AD PERICLEM PRAES. *<A 335 D. X K. NOV. NICOPOLI CONSTANTIO ET ALBINO CONSS.>

Imperatores Valentinianus, Valens. Potioris gradus iudicibus ab inferioribus competens reverentia tribuatur. Sed ubi publica tractatur utilitas, etsi minor iudex veritatem investigaverit, nulla maiori inrogatur iniuria. Sane qui insignia dignitatis ad hoc exercet, ut indignis iniuriis existimet adficiendos eos, qui officia cum potestate moderantur, non declinabit nostrae indignationis aculeos. * VALENTIN. ET VALENS AA. AD APRONIANUM PU. *<A 364 D. V. K. IUN. ANCYRO DIVO IOVIANO ET VARRONIANO CONSS.>

Imperatores Gratianus, Valentinianus, Theodosius. Civitas rhodiorum iniuriam suam non tam decenter quam sero conquesta est. Unde inviolabili observatione sancimus, ut, quoniam tempore hiemis navigatio saepe periculosa est semper incerta, in illis quinque urbibus, quae potiores esse ceteris adseruntur, vicissim hiemandum sibi iudices recognoscant. Quod si cuiquam tale existat ingenium, ut praecepta nostra contemnat, quinquaginta ab eo argenti librae, centum ab eius officio, si aliter factum fuerit, fisci viribus inferantur. * GRAT. VALENTIN. ET THEODOS. AAA. CYNEGIO PP. *<A 385 D. V ID. DEC. CONSTANTINOPOLI ARCADIO ET BAUTONE CONSS.>

Imperatores Valentinianus, Theodosius, Arcadius. Qui ordinariam gesserit dignitatem, quidquid ex venturae delegationis titulis profligaverit, cum dispendio pudoris atque fortunae de propriis facultatibus intra provinciam positus inferre debebit. * VALENTIN. THEODOS. ET ARCAD. AAA. CYNEGIO PP. *<A 386 D. VII K. IUN. CONSTANTINOPOLI HONORIO NP. ET EUODIO CONSS.>

Imperatores Valentinianus, Theodosius, Arcadius. Ne quis iudicum in provincia sua praefectianum vel palatinum vel militem vel ex his etiam omnibus, qui antea in huiusmodi officiis fuerunt commorati, intercessorem ( id est exsecutorem) cuiusquam litigatoris petitione in quolibet seu privato seu publico negotio putet esse tribuendum. Nam peccantem circa consulta caelestia cum suo officio non solum detrimentum famae, sed etiam patrimoniorum damna comitentur. * VALENTIN. THEODOS. ET ARCAD. AAA. CYNEGIO PP. *<A 386 D. NON. AUG. CONSTANTINOPOLI HONORIO NP. ET EUODIO CONSS.>

Imperatores Valentinianus, Theodosius, Arcadius. Nullus provinciae moderator augustissimam urbem sine iussione adire audeat. Nam si quem patuerit contra decreti nostri praecepta venisse, is congrua condemnatione plectetur. * VALENTIN. THEODOS. ET ARCAD. AAA. POLEMIO PP. ILLYRICI. *<A 390 D. X K. IAN. MEDIOLANI POST CONSULATUM TIMASII ET PROMOTI.>

Imperatores Arcadius, Honorius. Nullum palatinis tibi obsecundantibus cum provincialibus volumus esse commercium : sed iudices scire debebunt hoc sibi praecipue esse commissum, ut ipsi a provincialibus exigant et consueta deposcant, palatinum vero possessor non horreat, qui non sibi, sed iudicibus atque officiis praeceptus est imminere. * ARCAD. ET HONOR. AA. LIMENIO COM. SACR. LARG. *<A 401 D. VI K. APRIL.>

Imperatores Honorius, Theodosius. Moderatores provinciarum curam gerere iubemus, ne quid potentium procuratores perperam inliciteque committant. * HONOR. ET THEODOS. AA. THEODORO PP. *<A 408 D. VI K. DEC. RAVENNAE BASSO ET PHILIPPO CONSS.>

Imperatores Honorius, Theodosius. Omnes per provincias apparitores pro inveterata auctoritate iuxta motum iudicis nudatos verberibus, si ita res tulerit, subiacere praecipimus, ut et facilis exsecutio rerum publicarum sit et officiorum insolentia comprimatur et iudicum severitati competens reddatur auctoritas. * HONOR. ET THEODOS. AA. MONAXIO PP. *<A 412 D. VI K. IAN. HONORIO VIIII ET THEODOSIO V AA. CONSS.>

Imperator Leo. Si quis cohortalibus adhuc obsequiis obligatus regimen provinciae vel cingulum cuiuslibet militiae dignitatisve quoquo modo meruit, contra licitum usurpatis impetratisve careat, etiamsi ultronea nostra liberalitate ius gerendae provinciae vel militiae seu dignitatis cuiuspiam sibi iactaverit fuisse delatum. * LEO A. CONSTANTINO PP. *<A 471 D. VII ID. AUG. CONSTANTINOPOLI LEONE A. IIII ET PROBIANO CONSS.>

Imperator Leo. Nulli iudicum, qui provincias regunt, in civitatibus, in quibus sacra palatia vel praetoria sunt, liceat relictis his privatorum sibi domus ad habitandum veluti praetoria vindicare, sed sacratissima modis omnibus inhabitare palatia seu praetoria, ut hac necessitate compellantur eorum reparationi providere.

Ubi autem et palatium est et praetorium, palatium quidem habitationi praesidis, praetorium autem suscipiendis conservandisque speciebus publicis horreorum vice vel aliae necessariae rei deputetur.

Quod si quis aliquando dissimulare temptaverit, protinus eum atque officium quinquaginta librarum auri multam ad reparandum sacrum quod neglexerit palatium solvere sancimus.* LEO A. CONSTANTINO PP. *<A 471 ? >