Titulus 16

Imperator Antoninus Frater vester rectius fecerit, si se praesidi provinciae obtulerit: qui si probaverit non occidendi animo iustum a se percussum esse, remissa homicidii poena secundum disciplinam militarem sententiam proferet.

Crimen enim contrahitur, si et voluntas nocendi intercedat. Ceterum ea, quae ex improviso casu potius quam fraude accidunt, fato plerumque, non noxae imputantur * ANT. A. AURELIO HERCULIANO ET ALIIS MIL. *<A 215 PP.PRID.K.FEBR.LAETO II ET CEREALE CONSS.>

Imperator Gordianus Is, qui adgressorem vel quemcunque alium in dubio vitae discrimine constitutus occiderit, nullam ob id factum calumniam metuere debet. * GORD. A. QUINTIANO. *<A 243 PP.III NON.APRIL.ARRIANO ET PAPO CONSS.>

Imperator Gallienus Si, ut adlegas, latrocinantem peremisti, dubium non est eum, qui inferendae caedis voluntate praecesserat, iure caesum videri. * GALLIEN. A. MUNATIO. *<A 265 PP.XIII K.FEBR.VALERIANO ET LUCILLO CONSS.>

Imperatores Diocletianus, Maximianus Eum, qui adseverat homicidium se non voluntate, sed casu fortuito fecisse, cum calcis ictu mortis occasio praebita videatur, si hoc ita est neque super hoc ambigi poterit, omni metu ac suspicione, quam ex admissae rei discrimine sustinet, secundum id quod adnotatione nostra comprehensum est volumus liberari. * DIOCL. ET MAXIM. AA. EXEMPL. SACR. LITT. AGATHONI.*<A 290 D.PRID.K.DEC.SIRMI IPSIS AA.IIII ET III CONSS.>

Imperatores Diocletianus, Maximianus Si quis te reum Corneliae legis de sicariis fecerit, innocentia purgari crimen, non adulta aetate defendi convenit. * DIOCL. ET MAXIM. AA. ET CC. AGOTIO. *<A 294 S.VI K.NOV.ROMAE CC. CONSS.>

Imperatores Diocletianus, Maximianus Is, qui cum telo ambulaverit hominis necandi causa, sicut is, qui hominem occiderit vel cuius dolo malo factum erit commissum, legis Corneliae de sicariis poena coercetur. * DIOCL. ET MAXIM. AA. ET CC. PHILISCO. *<A 294 S.VII K.IAN.NICOMEDIAE CC. CONSS.>

Imperatores Valentinianus, Valens, Gratianus Si quis necandi infantis piaculum adgressus adgressave sit, sciat se capitali supplicio esse puniendum. * VALENTIN. VALENS ET GRAT. AAA. AD PROBUM PP. *<A 374 PP.VII ID.FEBR.ROMAE GRATIANO A.III ET EQUITIO CONSS.>

Imperatores Gratianus, Valentinianus, Theodosius, Arcadius Si forte mulier marito mortis parasse insidias vel quolibet alio genere voluntatem occidendi habuisse inveniatur, vel forte maritus eo modo insectetur uxorem, in eadem quaestione ab omni familia non solum mariti, sed etiam uxoris, quae tamen tunc temporis domi fuerit, quaerendum est sine cuiusquam defensione. * GRAT. VALENTIN. THEODOS. ET ARCAD. AAAA. CYNEGIO PP. *<A 385 D.III ID.DEC.ARCADIO A. ET BAUTONE CONSS.>