Titulus 7

Imperatores Valentinianus, Valens Perpensa deliberatione duximus sanciendum, ut, quicumque exercitium metallorum vellet adfluere, is labore proprio et sibi et rei publicae commoda compararet.

Itaque si qui sponte confluxerint, eos laudabilitas, tua octonos scripulos in balluca, quae Graece krusammos appellatur, cogat exsolvere.

Quidquid autem amplius colligere potuerint, fisco potissimum distragant, a quo competentia ex largitionibus nostris pretia suscipiant. * VALENTIN. ET VALENS AA. AD CRESCONIUM COM. METALLORUM. *<A 365 D. IIII ID. DEC. PARISIIS VALENTINIANO ET VALENTE AA. CONSS.>

Imperatores Valentinianus, Valens Ob metallicum canonem, in quo propria consuetudo retinenda est, quattuordecim unicas ballucae pro singulis libris constat inferri. * VALENTIN. ET VALENS AA. AD GERMANIANUM COM. SACR. LARG. *<A 367 D. VI ID. IAN. ROMAE LUPICINO ET IOVINO CONSS.>

Imperatores Gratianus, Valentinianus, Theodosius Cuncti, qui per privatorum loca saxorum venam laboriosis effossionibus persequuntur, decimas fisco, decimas etiam domino repraesentent, cetero modo suis desideriis vindicando. * GRAT. VALENTIN. ET THEODOS. AAA. FLORO PP. *<A 382 D. III K. SEPT. CONSTANTINOPOLI ANTONIO ET SYAGRIO CONSS.>

Imperatores Gratianus, Valentinianus, Theodosius Cum procuratores metallorum intra Macedoniam Daciam Mediterraneam Moesiam seu Dardaniam soliti ex curialibus ordinari, per quos sollemnis profligatur exactio, simulato hostili metu huic se necessitati subtraxerint, ad implendum munus retrahantur, et nulli deinceps licentia laxetur prius indebitas expetere dignitates, quam subeundam procurationem fideli sollertique exactione compleverint. * GRAT. VALENTIN. ET THEODOS. AAA. EUSIGNIO PP. *<A 386 D. IIII K. AUG. MEDIOLANI HONORIO NP. ET EUODIO CONSS.>

Imperatores Valentinianus, Theodosius, Arcadius Per annos singulos septeni per hominem scripuli largitionibus inferantur ab aurilegulis, non solum in Pontica dioecesi, verum etiam in Asiana. * VALENTIN. THEODOS. ET ARCAD. AAA. ROMULO COM. SACR. LARG. *<A 392 D. XI K. MART. CONSTANTINOPOLI ARCADIO A. II ET RUFINO CONSS.>

Imperatores Valentinianus, Theodosius, Arcadius Quosdam operta humo esse saxa dicentes id agere cognovimus, ut defossis in altum cuniculis alienarum aedium fundamenta labefactent. Qua de re, si quando huiusmodi marmora sub aedificiis latere dicantur, perquirendi eadem copia denegetur * VALENTIN. THEODOS. ET ARCAD. AAA. PATERNO. *<A 393 D. XVII K. APRIL. CONSTANTINOPOLI THEODOSIO A. III ET ABUNDANTIO CONSS.>

Imperator Theodosius Metallarii sive metallariae, qui quaeve ea regione deserta, ex qua videntur oriundi vel oriundae, ad externa migraverint, indubitanter sine ulla temporis praescriptione ad propriae originis stirpem laremque una cum sua subole revocentur, et quos domus nostrae secreta retineant. Sciant autem nullum exinde praeiudicium fisco esse generandum, etiamsi is, quem metallicum esse constiterit, privatis censibus suum nomen indiderit * THEODOS. A. MAXIMINO COM. SACR. LARG. *<A 424 D. V ID. IUL. CONSTANTINOPOLI VICTORE VC. CONS.>