Titulus 23

Imperatores Valentinianus, Valens Nautici apud praesidum vel magistratuum acta confiteantur incorruptas species suscepisse, eorumque, apud quos deponitur ista testatio, praesens adspectus probet nihil in his esse vitii. Quod eo tempore, quo ad sacrae urbis portum pervenit, praefecturam iugiter observare praeceptum est * VALENTIN. ET VALENS AA. AD IULIANUM PRAEF. ANNONAE. *<A 366 D.XVIII K.IUL.REMIS GRATIANO A.ET DAGALAIFO CONSS.>

Imperatores Arcadius, Honorius Si quid frumenti vel olei urbicarii canonis remissione indultum est speciali beneficio, contra commodum publicum elicita non valeant. * ARCAD. ET HONOR. AA. AD SENATUM ET POP. *<A 397 D.XVII K.MAI.MEDIOLANI CAESARIO ET ATTICO CONSS.>

Imperatores Arcadius, Honorius Neminem patimur in mutando canone urbis Romae nostrae clementiae beneficium postulare: sed etiam ea rescripta, quae quoquo modo potuerint impetrari, suscipi non sinimus. Eos vero, qui contra haec fecerint, in duplum retinendos esse decernimus.

Vicarios quin etiam ceterosque iudices, nisi deinceps ab usurpatione urbicarii canonis abstineant, deportationis poena detineri, primates officiorum capitali supplicio subiugari perpetua auctoritate sancimus. * ARCAD. ET HONOR. AA. MESSALAE PP. *<A 399 D.PRID.NON.SEPT.ALTINO THEODORO VC.CONS.>