Titulus 38

Imperatores Arcadius, Honorius Opinatores, quibus species in diversis provinciis delegantur, contra omnem consuetudinem nullis consistentibus familiis excoctionem panis efflagitant.

Illustris igitur auctoritas tua novam usurpationem congrua auctoritate repellat, ut, cum opinatores in provinciis delegantur, vetus consuetudo servetur. * ARCAD. ET HONOR. AA. STILICHONI COM. ET MAG. UTR. MIL. *<A 399 D.ID.SEPT.MEDIOLANI THEODORO VC.CONS.>

Imperatores Arcadius, Honorius In excoctione buccellati, quod devotissimis militibus convenit praeparari, in translatione etiam annonae nullius excipiatur persona, videlicet ut ne nostra quidem domus ab his habeatur immunis.

Et si quisquam, quod non opinamur, implere quae sunt praecepta neglexerit, in procuratorem eius severissime vindicetur, ita ut, si huiusmodi contumaciae dominum conscium esse constiterit, quadruplum id, quod pro eius capitatione poscitur, posthabita dilatione solvatur. * ARCAD. ET HONOR. AA.ET THEODOS. A. HADRIANO PP. *<A 404 D.VIIII K.APRIL. ROMAE HONORIO A.VI ET ARISTAENETO CONSS.>