Titulus 54

Imperatores Valentinianus, Valens Qui sese in officiis magistrorum equitum ac peditum militare monstraverint, ab omni nominationis iniuria excusentur. * VALENTIN. ET VALENS AA. AD ARTEMIUM CORRECTOREM. *<A 364 D. XIII K. OCT. AQUILEIAE. ACC. XV K. NOV. SALERNI DIVO IOVIANO ET VARRONIANO CONSS.>

Imperatores Valentinianus, Valens Qui in officio magistrorum equitum ac peditum militiam sortiti sunt, ordinis sint militaris. * VALENTIN. ET VALENS AA. AD MAMERTINUM PP. *<A X>

Imperatores Theodosius, Valentinianus Probari apparitores magisteriae potestatis neque curiales neque cohortales neque censibus volumus adscriptos. * THEODOS. ET VALENTIN. AA. CYRO PP. *<A 441 D. PRID. NON. MART. CONSTANTINOPOLI CYRO VC. CONS.>

Imperatores Theodosius, Valentinianus Numerarios virorum illustrium magistrorum militum tam praesentalium quam orientalium qui ordine stipendiis militiae fuerint decorati, exeuntes tribunis praetorianis partis militaris, sudoribus eorum beneficium deferentes, sociari praecipimus: ita videlicet, ut post completam militiam ab omnibus indictionibus tam militarium quam civilium iudicum semper habeantur immunes.

Principatus vero munere functos tribunis vigilum militaribus volumus adgregari. * THEODOS. ET VALENTIN. AA. APOLLONIO MAG. MIL. PRAESENTALI ANATOLIO MAG. MIL. PER ORIENTEM.*<A X>

Imperator Anastasius Eos, qui in officiis vestris merentes statutorum tantummodo numero inserti sunt, fori praescriptione muniri, ceteros vero, qui supra huiusmodi numerum militare noscuntur, quasi nec militantes et apud illustrissimas praefecturas et apud clarissimos provinciarum rectores de quolibet pulsari et conveniri et sine cinguli praescriptione respondere negotio sancimus. * ANASTAS. A. MAGISTRIS MIL. *<A X >