Titulus 6
TITULUS VI.
DE TESTAMENTIS ET ULTIMIS VOLUNTATIBUS.
Caput 1
Ordinarius loci rationem exigit a religiosis, etiam exemptis, de testamentorum exsecutionibus, quas gesserunt, et, si circa id deliquerint, illos punit.
Clemens V. in concilio Viennensi. Religiosis, etiam exemptis, deputatis ad exsecutionem cuiuslibet ultimae voluntatis, circa ipsius exsecutionis officium, (quod utique non possunt, nisi a superiore suo petita super hoc licentia et obtenta, suscipere,) volentes praescindere materiam delinquendi, praesentis constitutionis auctoritate statuimus, quod tales, etiamsi praelationis fungantur officio, locorum ordinariis debitam reddere, ipsique ordinarii ab eisdem absque dolo, fraude seu negligentia de susceptae exsecutionis officio teneantur exigere rationem, illos, quos circa id deliquisse repererint, in aliorum exemplum poena debita, quocunque non obstante privilegio, punituri.
