Text List

Prev

How to Cite

Next

Gratia

1

"Homo tunc peccatis uincitur, dum uiribus suis iuste uiuere conatur sine adiutorio liberantis gracie Dei." Augustinus super epistolam ad Romanos.

2

"Si graciam ideo tibi dedit Deus, quia gratis dedit, gratis ama. Noli ad premium diligere Deum; ipse sit premium tuum." Augustinus super Iohannem.

3

"Si leuis morbus esset, contempneretur; si morbus contempneretur, medicus non quereretur; si medicus contempneretur, morbus non finiretur. Ideo ubi habundauit peccatum, superabundauit et gracia." Augustinus de uerbis apostolorum.

4

"Sola gracia discernit redemptos a perditis, quos in unam concreuerat massam perditionis ab origine ducta causa communis." Augustinus in encheridion.

5

"Dei gracia cur ad istum ueniat, ad illum non ueniat, occulta esse causa potest, iniusta non potest." Augustinus de baptismo paruulorum.

6

"Lex Dei caritas est. Lex data est ut gracia quereretur; gracia data est ut lex impleretur." Augustinus de spiritu et littera.

7

"Talis est gracia Spiritus Sancti, ut si in corde tristiciam inuenit, consumit et dissoluit; si desiderium, permansiuum facit; si trepidationem, eciam abicit." Augustinus in quodam sermone.

8

"Vberior est gracia quam precatio. Semper enim plus Dominus tribuit quam rogatur." Ambrosius super Lucam.

9

"Gratia uehementior est ad diligendum quam natura. Reddendo uacuatur pecunia, gracia autem et habendo soluitur et soluendo retinetur." Ambrosius de officiis.

10

"Dum nos gracia diuini respectus illuminat, cuncta mentis nostre nobis abscondita manifestat." Gregorius libro VIII. moralium.

11

"Filii Israel manna deserentes, cum peponibus et carnibus porros cepasque quesierunt, quia uidelicet peruerse mentes gracie dona despiciunt, et pro carnalibus uoluptatibus laboriosa huius uite itinera eciam lacrimis plena concupiscunt." Gregorius in moralibus.

12

"Cum per semet ipsum loquitur Deus, de uerbo eius sine uerbis et sillabis cor docetur, quia uirtus eius intima quadam subleuatione cognoscitur. Ad quam mens plena suspenditur, uacua grauatur. Pondus quoddam est quod omnem animam quam replet leuat." Gregorius ibidem.

13

"Gracia in tribus consistere arbitror: in odio preteritorum malorum, contemptu presencium bonorum, et desiderio futurorum." Bernardus de libero arbitrio.

14

"Preoccupatum quippe secularibus desideriis animum delectatio sancta declinat, nec misceri poterunt uana ueris, eterna caducis, spiritualia corporalibus, summa ymis, ut pariter sapias que sursum sunt et que super terram." Bernardus sermone LXXVII.

15

"In ueritate didici nil eque efficax esse ad graciam promerendam, retinendam, recuperandam, quam si omni tempore coram Deo inueniaris nec altum sapere, sed timere. Beatus homo qui semper pauidus est. Time cum abierit, time cum denuo reuertetur, et hoc est semper pauidum esse." Bernardus super Cantica sermone LIIII.

16

"Gracia balsamum purissimum est; et ideo purum, solidum et profundum uas requirit." Bernardus ibidem.

17

"Aliquando plerique et uitam habentes mundam, non accipiunt graciam. Quare? Ne in superbiam eleuentur, ne inflentur uentositate iactancie, ne altitudo muneris negligentiores efficiat." Crisostomus super epistolam ad Hebreos.

18

"Pauper et creditor obuiauerunt sibi, utriusque illuminator est Dominus. Prouerbium XXIX. Glossa Bede: Pauper est humilis auditor, creditor, predicator qui sibi obuiant cum in unam pietatis graciam conueniunt. Vtriusque illuminator est Dominus, quia nec iste predicat, nec ille credit sine Dei munere. Vnde sine me nichil potestis facere." Beda in glossa.

19

Aduentus b; Anima o; Cor d; Creatio b; Deuotio h; Maria r; Penitencia m; Predicatio ae; Salus a.

PrevBack to TopNext

On this page

Gratia