Canon 24

24. Quia propter diuersas electionum formas, quas quidam inuenire conantur, et multa impedimenta proueniunt et magna pericula imminent ecclesiis uiduatis, statuimus ut cum electio fuerit celebranda, presentibus omnibus qui debent et uolunt et possunt commode interesse, assumantur tres de collegio fide digni, qui secreto et singillatim uota cunctorum diligenter exquirant, et in scriptis redacta, mox publicent in communi, nullo prorsus appellationis obstaculo interiecto, ut is collatione habita eligatur, in quem omnes uel maior et sanior pars consentit; uel saltem eligendi potestas aliquibus uiris idoneis committatur, qui uice omnium ecclesie uiduate prouideant de pastore. Aliter electio facta non ualeat, nisi forte communiter esset ab omnibus, quasi per inspirationem, absque uitio celebrata. Qui uero contra prescriptas formas eligere attemptauerint, eligendi ea uice potestate priuentur. Illud autem penitus interdicimus, ne quis in electionis negotio procuratorem constituat, nisi sit absens in eo loco de quo debeat aduocari iustoque impedimento detentus uenire non possit; super quo si opus fuerit, fidem faciat iuramento, et tunc si uoluerit uni committat de ipso collegio uicem suam. Electiones quoque clandestinas reprobamus, statuentes ut quam cito electio fuerit celebrata, sollempniter publicetur.