I, P. 1, Inq. 2, Tract. 1, Q. 4, Praeambulum

Postquam disseruimus de numero divinarum personarum, de ordine earumdem, virtute Dei iuvante, inquiramus. Et quia circa ordinem multae sunt dubitationes, de eis per ordinem discutiendum est: Primo, an sit ordo in divinis personis; secundo, cuiusmodi sit ille ordo, utrum naturae vel originis; tertio, de ordine originis, an sit ibi aliqua persona sine origine; quarto, an possint esse plures personae sine origine; quinto, an duae habentes originem immediate procedant ab illa quae non habet originem, ita quod neutra ab alia, sicut ponebant Graeci; sexto, an illa, quae habet originem ab alia, habet similiter originem a prima immediate; septimo, an processio Spiritus Sancti consequatur ordine naturae ad generationem Filii vel e converso; octavo, an abstractis hypostasibus sive personis sit intelligere ordinem naturae in Trinitate et e converso.