Articulus 19

ARTICULUS XIX. Utrum solus Deus habeat immortalitatem, quid est immortalitas, et que dicuntur vivere et mori?

Deinde quaeritur de hoc quod dicit : "Qui solus habet immortalitatem, etc."

Quid vocetur immortalitas ? Est enim immortalitas naturalis potentia ad non mori, vel ad resistendum his quae inducunt mortem : et haec tantum in viventibus videtur esse : variabilia autem non omnia vivunt : ergo videtur, quod non moriantur.

Ad hoc dicendum, quod vivere et mori sumuntur hic a vita communiter accepta qua dicimus aquam vivam, et lapidem vivum, et hajusmodi : et hoc nihil aliud est quam actus completus potentia qui est secundum rei naturam : quando enim illum actum facere potest, dicitur vivere, ut aqua viva quando est in im-~ petu refrigerandi, vinum vivum quando perfecte penetrat in gustu, petra viva in soliditate duritiei : et effectus secundum speciem consequentis, sicut sapphirus vivus quando expellit venenum. Et cum hujusmodi vita sit a proprietatibus rerum, quando mutantur in illis, mutantur in hujusmodi actibus : et ideo mori dicuntur.