Articulus 10

ARTICULUS X. Utrum praeter missionem interiorem invisibilem necessaria fuerit exterior missio ?

Deinde quaeritur de hoc quod dicit : "Ut exterioribus visis corda hominum, etc."

1. Illa enim visa aut sufficiebant ad cognitionem occulte deitatis et distinctionis personarum sine interiori missione, aut non: si sic, tunc interior missio inutilis fuit.

2. Praeterea, Cum interior conferat gratiam, videretur tune, quod cognitio Trinitatis sine gratia posset haberi, quod falsum est, sicut supra’ ostensum est. Si autem oportuit adesse interiorem, cum illa per inspirationem doceat, videtur tunc inutilis fuisse exterior.

Solutio. Dicendum, quod in veritate exterior est testimonium interioris, ut dicitur in Littera : quia significabatur, quod in illis quibus fiebat talis missio, vel ad quorum praedicationem fiebat et intercessionem, esset gratia redundans, ut dictum est: et ideo non erat processio inutilis exterior pro statu et tempore.

Deinde quaeritur de hoc quod dicit : "Qui nec in illis creaturis magis erat, etc."

Hoc enim non videtur : quia magis cognoscitur aliquid inesse per majorem effectum : plus autem effecit in illis, quam in aliis : ergo magis erat in illis.

Solutio. Ista ratio peccat ex hoc quod mutatur discretum in intensius : non enim sequitur, quod si pluribus modis infuit, quod magis infuerit, nisi illi modi facerent intensionem : unde Magister bene dicit, quod "ad aliud" infuit.