UTRUM CHRISTUS IN OMNI ORATIONE SUA FUERIT IN OMNIBUS EXAUDITUS.
Consequenter quaeritur utrum Christus in omni
oratione sua fuerit in omnibus exauditus.
Quod probetur a. per illud Hebr. 5, 7: "In omnibus
exauditus estpro sua reverentia".
b. Item, ipse pie et iuste petiit in omnibus et quod petendum erat ; ergo in omnibus debuit
exaudiri.
c. Item, ipse erat summus sacerdos "sanctus,
innocens, impollutus", sicut dicitur ad Hebr. 7, 26.
Ergo ipse pro omnibus debuit impetrare pro quibus
oravit.
d. Item, Psalmus: "Voluntate labiorum eius
non fraudasti eum".
Contra: 1. Psalmus: "Deus meas, clamabo
per diem, et non exaudies" etc.
2. Item, petiit ut transiret passio, in quo
non est exauditus; non ergo in omnibus exauditus
est.
Respondeo: Dicendum quod "in omnibus est
exauditus", quantum est de se, secundum formam
petitionis.
[Ad obiecta]: 1. Illa ergo auctoritas "Psalmi": "Deus meus, clamabo per diem, et non exaudies",
non intelligitur de capite secundum se, sed de
capite ratione membrorum.
2. Ad aliud dicendum quod secundum formam
petitionis est exauditus, non secundum materiam:
non enim petiit passionem amoveri absolute, sed
sub conditione.
