Titulus 13

Imperator Gordianus Neque ex eius filii persona, qui, cum sui iuris esset, mutuam pecuniam accepit, pater eius, si non fidem suam obstrinxit, conveniri potest, neque ex eius quem in potestate habet, si sine eius iussu contractum est neque contra senatus consultum Macedonianum mutua data est, amplius dumtaxat de peculio actionem sustinere cogitur.

Quapropter pater quoque tuus, si ei pecunia a creditore fratris tui extorta est, ob quam reddendam non tenebatur, praesidis provinciae auctoritate eam recuperabit. * GORD. A. CANDIDO MIL. *<A 238 PP. III NON. OCT. PIO ET PONTIANO CONSS.>

Imperatores Diocletianus, Maximianus Ne contra iuris auctoritatem ab eo, qui patrem vestrum, a quo emancipatos vos dicitis, ad munus civile devocaverat, inquietemini, praeses provinciae providebit. * DIOCL. ET MAXIM. AA. NEOTERIO ET EUTOLMIO. *<A 286 D. VIII K. FEBR. MAXIMO II ET AQUILINO CONSS.>

Imperatores Diocletianus, Maximianus Si filius familias invito patre decurio creatus fuerit, pro eo patrem inquietari non posse iure manifestissimo cautum est. * DIOCL. ET MAXIM. AA. ET CC. THEOGENI. *<A 294 S. X K. MAI. SIRMI CC. CONSS. >

Imperatores Diocletianus, Maximianus Patris nomine superstitis filium nec munerum civilium nec debiti causa personali posse conveniri constat actione. * DIOCL. ET MAXIM. AA. ET CC. ACHAEO. *<A 294 S. XII K. MART. SIRMI CC. CONSS.>

Imperatores Diocletianus, Maximianus Ex patroni vel domini contractu liberti vel servi conveniri non possunt. * DIOCL. ET MAXIM. AA. ET CC. LAMPETIO. *<A 294 S. III ID. APRIL. CC. CONSS.>