Titulus 37

Imperatores Valentinianus, Theodosius, Arcadius. Omnia tributa per Aegyptiacam dioecesin cura et providentia claritatis tuae a moderatoribus provinciarum exigi iubemus. Si qui tamen ex possessoribus sive militaribus sive non militaribus ad inferenda quae debent audaces extiterint, eos per militare etiam auxilium, si opus exegerit, ad solutionem compelli censemus. * VALENTIN. THEODOS. ET ARCAD. AAA. FLORENTIO PRAEF. AUGUSTALI.*<A 386 D. XIII K. MART. CONSTANTINOPOLI HONORIO NP. ET EUODIO CONSS.>

Imperatores Theodosius, Arcadius, Honorius. Praefectus Augustalis ordinariorum sub se iudicum examinandi flagitia et super his referendi, non amovendi vel puniendi habeat potestatem. * THEODOS. ARCAD. ET HONOR. AAA. RUFINO PP. *<A 395 D. PRID. NON. DEC. CONSTANTINOPOLI OLYBRIO ET PROBINO CONSS.>