Praeambulum

Ad intelligentiam eorum, quae in hac parte dicuntur de lapsu Angelorum, tria incidunt quaerenda. Primum est, de quo ordine vel dignitate ceciderunt. Secundum est, in quid ceciderunt. Tertium est de ordine sive praelatione eorum post casum. Circa primum duo quaeruntur. Primo quaeritur, de quo ordine fuit lucifer. Secundo, de quo ordine lapsi sunt minores Angeli.