Caput 8

"Die illo." Tenet Esther domum Aman, hostis Judaeorum, cum Ecclesia possidet mundum, quem possederat diabolus, hostis Christianorum; unde: "Cum fortis armatus custodit atrium suum ," etc. Ingreditur ante faciem regis Mardochaeus, cum quotidie sanctorum animae de incolatu praesentis vitae ingrediuntur ad contemplationem divinae majestatis.

"Domum Aman." Dignitatem et honorem quem Judaei scientia legis, et prophetarum, et cultu religionis habuerunt; unde in Proverbiis: "Custoditur justo substantia peccantis ." Et in Evangelio: "Auferetur a vobis regnum, et dabitur genti facienti fructus ejus ."

"Tulitque rex." Laudante et praedicante instantiam magistrorum, a Domino pro gratia gratiam accipiunt in conspectu conditoris omnium; unde: "Nutrivit corda fidelium."

"Tradidit Mardochaeo." Praedicatoribus gentium ut sibi haererent, et gentibus ministrarent.

"Procidit ad pedes," etc. Quia sancta Ecclesia, pro ereptione filiorum suorum, quotidie Deum omnipotentem per fidem et mysteria incarnationis exorat, ut hostium comprimatur audacia, et fidelium liberetur innocentia.

"Obsecro ut." Quia evangelica doctrina, quae Christi nomine in toto orbe praedicatur, Spiritus sancti signaculo confirmata declaratur, cujus dono repleti ipsi praedicatores permanserunt insuperabiles, et hostium suorum gloriosi triumphatores.

"Accitisque scribis," etc. Quia Evangelii doctrina ita condita est per scriptores Novi Testamenti, Domino mediante, ut sanctae Trinitatis fides plenissime in ea contineretur, et totius decalogi summa perfectio in duobus praeceptis charitatis demonstraretur.

"Qui centum viginti." In quibus totus mundus signatur. Nam denarius numerus per duodenarium multiplicatus centum et viginti facit, quibus septenarius sociatus totius summae plenitudinem concludit: ita decalogi custodia apostolica traditione per totum orbem diffusa, septiformis Spiritus gratia in cordibus fidelium infunditur vel est consummata.

"Interficerent," etc. Ne mali germinis pullularent rediviva plantaria. Similiter septem gentes quae habitabant in terra promissionis Dominus interfici jussit, et postmodum Amalechitas omnimode deleri, ut omnem occasionem scandali auferret eis; unde David ait: "In matutino interficiebam", etc.

"In Susan," etc. In superbia mundi debellanda. Nam Susis equitatio vel evertens interpretatur; unde Salvator ait: "Confidite, ego vici mundum ."