Capitulum 4

Solet etiam quaeri, an valeat duci in coniugium quae prius polluta est per adulterium.

De hoc Leo Papa ait: "Nullus ducat in matrimonium, quam prius polluit adulterio".

Item: "Relatum est auribus sanctorum sacerdotum, quendam alterius uxorem stupro violasse, et insuper moechae iuramentum dedisse, quod post legitimi mariti mortem, si superviveret, duceret eam uxorem; quod et factum est. Tale ergo connubium prohibemus et anathematizamus".

His aliisque auctoritatibus vetantur in coniugium copulari qui se prius adulterio maculaverunt.

Sed econtra Augustinus testatur dicens: "Denique mortuo eo, cum quo fuit verum connubium, fieri potest coniugium cum qua praecessit adulterium".

Idem: "Posse fieri sane licitas nuptias ex personis illicite coniunctis, honesto placito subsequente, manifestum est".

Sed haec ultima auctoritas de concubinis loquitur, perhibens concubinam posse transire ad honestum placitum nuptiarum, si castitatem et fidem servare velit.

Prima vero auctoritas Augustini de illis agit, qui de peccato poenituerunt et nihil in morte viri machinati sunt, nec vivente viro, fidem adulterae dedit moechus, quod eam in coniugio duceret, si superviveret. Qui vero haec faciunt, aliis praemissis auctoritatibus prohibentur copulari.