Auditor

"Tucius auditur ueritas quam predicatur, quoniam cum doctrina recipitur, humilitas custoditur. Cum autem disputacio uel predicacio placet, uix est ut disserentem non pulset quantalacumque iactancia." Augustinus de doctrina Christiana et super Iohannem omelia LVII.

"Vidit apostolus in audiendo facillime seruari humilitatem que difficilis est in docendo, quoniam necesse est ut doctor habeat superiorem locum, ubi laboriosum est optinere ne subrepat elacio." Augustinus super illud Iacobi I.: Sit omnis homo uelox ad audiendum.

"Cum uerbum boni auditores esuriunt, pro reficiendis eis maiora doctoribus intelligencie dona tribuuntur. Sepe enim doctori uerbum Dominus pro gracia tribuit auditoris, non numquam uero propter auditoris culpam subtrahitur sermo doctori." Gregorius in pastorali et in moralibus.

"Nisi spiritus sanctus auditorum corda repleat, ad aures corporum uox docencium incassum sonat. Formare enim uocem magistri exterius possunt, sed hanc interius imprimere non ualent." Gregorius XXVII. moralium.

"Via Domini ad cor dirigitur cum ueritatis sermo humiliter auditur." Gregorius in omelia.

"Multi legunt et ab ipsa lectione ieiuni sunt. Multi uocem predicacionis audiunt sed post uocem uacui recedunt, quorum etsi uenter comedit uiscera non replentur, quia etsi mente intellectum sacri uerbi percipiunt, obliuiscendo et non seruando que audierunt, hec in cordis uisceribus non reponunt." Gregorius omelia X. super illud Ezechielis: Venter tuus comedet.

"Verba Dei que aure percipitis mente retinete. Cibus enim mentis est sermo Dei, et quasi acceptus cibus stomacho languente reicitur, quando auditus sermo in uentre memorie non tenetur. Sed quisquis alimenta non retinet, huius profecto uita desperatur. Eterne ergo mortis periculum formidate, si cibum quidem sancte exhortacionis accipitis sed uerba uite, id est alimenta iusticie, in memoria non tenetis." Gregorius omelia XV. super ewangelia super illud: Exiit qui seminat.

"Auris bona est que libenter audit utilia, prudenter discernit audita, obedienter operatur intellecta." Bernardus in quadam epistola.

"Dele, inquit, litteras magis sculpturas quas dyabolus in tua impressit anima et fer michi cor a uite huius tumultibus liberum." Chrysostomus super Mattheum omelia XI.

"Frequenter ipsa eadem audire et scientibus prodest; quod enim nouimus si sepius audiamus, amplius compungimur?" Chrysostomus sermone VII. super epistolam ad Hebreos.

"Prudens auditor omnes libenter audit, omnia legit, non scripturam, non personam, non doctrinam spernit; ab omnibus indifferenter quod sibi deest et quod deesse uidet, querit; non quantum sciat, sed quantum ignorat, considerat." Hugo de sancto Victore in suo didascalicon.

"Quidam ueniunt ut audiant non ut discant, sicut in theatrum uoluptatis causa ad delectandas aures oracione uel uoce uel fabulis ducimur. Magnam hanc partem auditorum uidebis, cui philosophi scola diuersorium ocii sit. Non id agunt ut aliqua illo uicia deponant, ut aliquam legem uite accipiant qua mores suos erigant, sed ut oblectamento aurium perfruantur. Aliqui eciam cum pugillaribus ueniunt, non ut res accipiant, sed ut uerba que tam sine profectu alieno discant quam sine suo audiunt." Seneca epistola CX.