Gaudium

"Est gaudium quod non datur impiis, sed eis qui te gratis colunt, quorum gaudium tu ipse es. Et ipsa est beata uita gaudere de te, propter te. Ipsa est et non est altera." Augustinus X. confessionum.

"Temporalibus gaudent, qui bona eterna desiderare non norunt." Augustinus super Psalmum LII.

"Comparemus gaudia ueritatis cum gaudio uanitatis; et si horremus, doleamus; si dolemus, oremus; si oramus, exaudiamur; si exaudiamur, et illos lucramur." Augustinus super Iohannem.

"Inepta leticia dicit: Vt quid animi gaudium intus abscondis? Ingredere in publicum letus, dic aliquid foris unde uel tu uel proximi rideant; fac eos letos tua leticia." Augustinus de conflictu uiciorum.

"Animi leticia interdum corporis dolores mitigat; quod si ad egrotationem corporis accedat egritudo animi, duplicatur infirmitas." Ieronymus super Ysaiam.

"Dignum est itaque, ut in se semper homo merores inueniat ut qui, derelicto creatore, gaudium in se querebat." Gregorius XII. moralium.

"Iure restat, ut quot prius in mundo incolumes habuimus gaudia, tot de ipso postmodum cogamur sentire tormenta." Gregorius in moralibus.

"Fit plerumque, ut in ipsis piis fletibus illa interni gaudii claritas erumpat; et mens que in corpore prius ceca iacuerat, ad inspectionem fulgoris intimi suspiriis uegetata conualescat." Ibidem.

"Non nunquam quicquid gaudii, quicquid uirtutis fauere uidebatur, subito in pauore temptationis amittitur, et quasi euacuaturus eisdem uirtutibus tristis animus solo merore possidetur." Ibidem.

"Iubilum namque dicitur, quando ineffabile gaudium mente concipitur, quod nec abscondi possit, nec sermonibus aperiri, et tamen quibusdam proditur motibus, quamuis nullis proprietatibus exprimatur." Gregorius libro XXIIII. moralium.

"Iubilatio dicitur cum cordis leticia oris efficacia non expletur, sed quibusdam modis gaudium prodit, quod ipse qui gaudet, nec regere preualet, nec explere." Gregorius libro XXVIII. moralium.

"Solet leticia archana mentis aperire, atque aperiendo amittere, aduersa uero cum nos exterius deprimunt, interius cautiores reddunt." Ibidem.

"Illud est uerum ac summum gaudium, quod non de creatura sed de creatore concipitur, quod cum acceperis nemo tollet a te, cui aliunde comparata omnis iocunditas meror est, omnis suauitas dolor est, omne dulce amarum est, omne decorum fedum est, omne postremo quod delectari potest molestum est." Bernardus in quodam sermone.

"Verum gaudium non possidetur, nisi pax et iusticia teneatur. Prima enim est et quasi radix iusticia, secunda pax, tercia gaudium; de iusticia nascitur pax, de pace gaudium generatur". Cesarius in ammonitione XL.

"Mensura leticie de magnitudine nuncii uenit, et tanta fit alacritas animi, quanta fuerit consideratio rei." Cassiodorus libro I. epistolarum.

"Bonum insolitum plus amatur et sequenti gaudio confert dulcedinem temporum premissa tristicia." Cassiodorus ibidem.

"Dicimus nos magnum gaudium ex illius consulatu quod non est gaudium, sed ut sepe inicium future tristicie. Gaudio enim iunctum est non desinere nec in contrarium uerti. Omnes tendunt ad gaudium, sed unde stabile et magnum consequantur ignorant. Ille ex conuiuiis et luxuria, ille ex ambitione et circumfusa clientum turba, ille ex amica, alius ex studiorum liberalium uana ostentatione et nil sonantibus litteris: omnes istos oblectamenta fallacia et breuia decipiunt, sicut ebrietas, que unius hore hylarem insaniam longi temporis tedio pensat." Seneca LXVII. epistola.

"Malum alienum tuum ne feceris gaudium." Seneca in prouerbiis.

Contemptus m; Iudex t; Securitas n; Tristicia.