Canon 44

44. ‘Cum laicis quamuis religiosis disponendi de rebus ecclesiasticis nulla sit attributa potestas, quos subsequendi manet necessitas, non auctoritas imperandi’, dolemus sic in quibusdam ex illis refrigescere caritatem quod immunitatem ecclesiastice libertatis, quam nedum sancti patres set etiam principes seculares multis priuilegiis munierunt, non formidant suis constitutionibus uel potius confictionibus impugnare, non solum de alienatione feudorum ac aliarum possessionum ecclesiasticarum et usurpatione iurisdictionum, set etiam de mortuariis nec non et aliis que iuri spirituali uidentur annexa, illicite presumendo. Volentes igitur super hiis ecclesiarum indempnitati consulere ac tantis grauaminibus prouidere, constitutiones huiusmodi et uenditiones feudorum seu aliorum bonorum ecclesiarum, sine legitimo ecclesiasticarum personarum assensu presumptas, occasione constitutionis laice potestatis, cum non constitutio set destitutio uel destructio dici possit nec non usurpatio iurisdictionum, sacri approbatione concilii decernimus non tenere, presumptoribus per censuram ecclesiasticam compescendis.