Canon 61

61. In Lateranensi concilio 1 noscitur fuisse prohibitum ne quilibet regulares ecclesias seu decimas, sine consensu episcoporum, de manu presumant recipere laicali nec excommunicatos uel nominatim interdictos admittant aliquatenus ad diuina. Nos autem id fortius inhibentes, transgressores condigna curabimus animaduersione punire, statuentes nichilominus quatenus in ecclesiis que ad ipsos pleno iure non pertinent, iuxta eiusdem statuta concilii, episcopis instituendos presbyteros representent ut illis de plebis cura respondeant; ipsis uero pro rebus temporalibus rationem exhibeant competentem. Institutos uero remouere non audeant episcopis inconsultis. Sane adicimus ut illos representare procurent quos uel conuersatio reddit notos uel commendat probabile testimonium Prelatorum.