I, P. 1, Inq. 1, Tract. 5, Sect. 2, Q. 4, T. 1, Praeambulum

Ordine consequenti, adiuvante Domino, quaerendum est de praedestinatione et eius opposito, scilicet reprobatione, simulque de divina electione et dilectione. Praedestinatio enim divina ponit electionem et dilectionem; omnis enim praedestinatus a Deo est electus et dilectus, sed non convertitur: electus enim aliquis dicitur tantum quantum ad praesentem iustitiam, sicut ludas, quamvis sit reprobus; item, omnis electus est dilectus; haec non convertitur: electio enim respicit gratiam, dilectio vero non solum gratiam, sed naturam; gratia autem ponit naturam, sed natura non ponit gratiam: unde dilectus dicitur adhuc qui malus est ratione naturae Praedestinatio ergo semper respicit gloriam, electio non semper respicit gloriam, sed semper gratiam; dilectio non semper gratiam vel gloriam, sed semper naturam. Quaerendum est igitur: Primo de praedestinatione divina; secundo, de reprobatione; tertio, de electione; quarto, de dilectione.

Quantum ad primum: Primo quaeritur de praedestinatione quid sit; secundo, quorum sit; tertio, si causa vel ratio eius sit; quarto, quae causalitas eius sit.