I, P. 2, Inq. 2, Tract. 1, Q. 2, M. 1, Praeambulum

Quantum ad primum notandum, secundum Sanctos, quod hoc nomen Deus accipitur tripliciter: naturaliter, cum accipitur pro essentialiter Deo, ut: "In principio creavit Deus caelum et terram" ; adoptive, cum accipitur pro sanctis, eo quod sunt in participatione divinitatis — et hoc vel in participatione potentiae, propter quod dicitur Moysi, Exod. 7, 1 et 22, 28: "Constitui te deum Pharaonis. Diis non detrahes" ; vel in participatione sapientiae, ut in Psalmo: "Ego dixi: dii estis", quod exponit Dominus, Ioan. 10, 34; vel in participatione bonitatis, unde: "Deus deorum Dominus locutus est" — nuncupative, ut cum hoc nomen Deus attribuitur iis qui non sunt dii participatione deitatis, ut idolis vel daemoniis, in Psalmo: "Omnes dii gentium daemonia".

Quaeruntur igitur duo: Primo, utrum hoc nomen Deus dicatur aequivoce vel univoce, cum accipitur naturaliter, adoptive, nuncupative; secundo, utrum hoc nomen Deus, secundum quod accipitur naturaliter, sit nomen operationis.