I, P. 2, Inq. 2, Tract. 2, Sect. 1, Q. 1, Praeambulum

Consequenter quaerendum est de nominibus personalibus. Horum autem quaedam sunt absoluta, ut persona, hypostasis ; quaedam respectiva, ut Pater, Filius ; quaedam distinctiva, ut unus, aliquis ; quaedam collectiva, ut Trinitas et trinus. Vel aliter: nominum personalium quaedam sunt collectiva, quaedam distinctiva, quaedam nec sic nec sic; et horum quaedam sunt communia, ut persona, subsistentia, hypostasis ; quaedam propria, ut Pater, Filius, Spiritus Sanctus. Secundum ergo hunc modum quaerendum est: Primo, de nominibus personalibus communibus et absolutis; secundo, de propriis et relativis; tertio, de nominibus distinctivis; quarto, de nominibus collectivis. Item, nomina communia absoluta personalia ponuntur tria: persona, subsistentia, hypostasis. Primo ergo quaerendum est de nomine quod est persona ; secundo, de subsistentia ; tertio, de hypostasi.