Ia-IIae, Inq. 3, Tract. 2, Q. 3, T. 3, M. 2, C. 4

Adhuc etiam quaeritur propter quid dicitur: "Ad imaginem Dei creavit illum", postquam dictum est: "Creavit Deus hominem ad imaginem et similitudinem suam".

[Solutio]: Ad quod dicendum quod primo dixit pluraliter, ut exprimeretur Trinitas personaliter, secundo singulariter, ut exprimeretur unitas essentiae: uti imago responderet unitati essentiae in Trinitate personarum. Sed unitas essentiae est in duplici ratione: in quantum est forma exemplaris et in quantum est finis; et ideo exprimendo exemplarem dixit: Creavit Deus ad imaginem suam; exprimendo conversionem iterum ad ipsam tamquam ad finem dicitur: "Ad imaginem Dei creavit illum". Et hoc est quod dicitur in Eccli. 17,1-2: "Secundum imaginem Dei fecit illum et iterum convertit illumin ipsam", ubi loquitur de conditione primi hominis.