III, P. 1, Inq. 1, T. 2, Q. 2, Praeambulum

Consequenter quaerendum est de sanctitate conceptionis et hoc dupliciter: Primo, quantum ad sanctitatem concipientis matris; secundo, quantum ad sanctitatem concepti filii. Item, de sanctitate concipientis dupliciter: Primo, de illa quae fuit ante conceptionem filii et ante Virginis nativitatem in utero suae matris; secundo, de illa quae fuit in conceptione filii, cum facta est mater. Quaeruntur igitur haec in parte ista: De prima sanctificatione Virginis in utero matris; de secunda sanctificatione Virginis in conceptu Salvatoris; de sanctitate concepti filii, ad quod introducitur quaestio de decimatione Christi an fuerit decimatus in Abraham. Quantum ad primum quaeritur: Quorum sit sanctificatio, ut pateat quid sit; in quo casu fuerit Virginis sanctificatio vel sanctificata; a quo fuerit sanctificatio vel sanctificata.