Articulus 27

ARTICULUS XXVII. An anima propter accidentia sua bene probatur esse composita ?

Deinde quaeritur de hoc quod dicit: "Cum enim aliud sit artificiosum esse, etc."

Videtur enim, quod hoc non inducat compositionem : quia accidens non inest ut pars rei, ut dicit Philosophus: nihil autem componit nisi pars: ergo ex hoc non probatur animam esse compositam.

Ad hoc dicendum, quod Augustinus bene probat : quia ex hoc accipitur, quod dupliciter est composita, scilicet in sua essentia, et compositione concretionis. In sua quidem substantia : quia nihil potest esse subjectum accidentis nisi quod in se est compositum : et hoc probatur per Boetium in libro de Trinitate, ubi dicit sic : Forma simplex subjectum esse non potest. Ex hoc ergo quod anima est subjectum accidentium, ut artium, scientiarum, et virtutum, ipsa relinquitur esse composita.

Dicendum ergo ad objectum, quod Augustinus intendit, quod accidentia illam compositionem demonstrant essentialem : et insuper compositionem concretionis faciunt, in qua non exigitur quod componens sit pars.