Caput 15

"Responsio mollis frangit iram." Qui verba increpantis humiliter suscipit, jam propinquat veniae reatus quem gessit. Qui arguenti resultat, contra se iram judicis provocat.

"Ebullit stultitiam." Scripturam pervertendo, suos sensus auctoritati praeponendo; velut fatui philosophi, ut Porphyrius, et Julianus, qui contra Ecclesiae doctores stultitiae suae fluenta fundebant.

"Stultus irridet." Stultus est omnis peccator, qui, terrenis actibus deditus, futurum nihil praevidet: is disciplinam irridet, dum derogat divinae correctioni.

"Cor stultorum dissimile." Vel dissimile sibi ipsi, variis cogitationibus, et nunquam idem manet. Contra quod de Anna dicitur: "Vultusque ejus non sunt amplius in diversa mutati."

"Doctrina mala. Qui solverit unum de mandatis istis minimis, et docuerit sic homines, minimus est in regno coelorum." Talibus tamen, si correcti fuerint, patet reditus ad veniam: si autem increpationes non receperint, omnino morientur.

"Omnes dies." " Omne tempus populi Dei, etc., usque ad quasi jugi delectantur convivio."

"Melius est vocari ad olera." Multo enim utilius est simplicis vitae innocentiam cum charitate servare, etc., "usque ad, discedite a me operarii iniquitatis."

"Pigrorum," " quos piget operari justitiam, etc., usque ad sed quia hoc bonos non praepedit, adjungit:"

"Via justorum absque offendiculo." Justi enim quidquid adversitatis in sua conversatione invenerint, non offendunt, quia aeternae spei et internae contemplationis saltu adversa transiliunt.

"Laetatur homo." Humanum est de sententia quasi prudenter prolata laetari. Sed vere sapiens non solum quod loquitur, sed etiam opportunitatem loci, et temporis, et personae cui loquitur, diligenter inquirit.

"De inferno novissimo," etc. Primus infernus caecitas peccantis animae, et verae lucis scientia carentis, de quo: "Descendunt in infernum viventes".

"Viduae Ecclesiae," scilicet sponsae suae, pro cujus vita mori dignatus est.

"Firmabitur:" in judicio, quando non solum factis, sed et verbis omnibus digna praemia reddet.

"Lux oculorum laetificat animam." " Jure mentem delectat humanam, etc., usque ad sic enim magis fervet opus."

"Lux oculorum." Alia translatio: "Videns bona oculus delectat corda bona," scilicet, Domini in terra viventium, quae, quia in oculo mentis contemplatur, merito corde delectatur, quamvis affligatur exterius.