Caput 11

"Dixerit opera," etc. RAB. "Populus Christianus per desertum hujus mundi prophetiam sequitur, ut perveniat ad patriam regni coelestis; unde Petrus: "Habemus propheticum sermonem, cui bene facitis attendentes quasi lucernae lucenti in caliginoso loco", etc."

"De petra altissima," etc. Petra autem erat Christus, qui virga crucis percussus, quae erat in manibus, id est in scripturis prophetarum, fudit aquam vivam.

"Per quae enim poenas," etc. RAB. " Memoratis beneficiis, etc., usque ad sive ergo patiantur, sive non, gloria est eis."

"Cum enim tentati." RAB. "Israelitas peccantes dignis plagis corripuit Deus, et poenitentes consolatus est, Aegyptios et Chananaeos tanquam misericordia indignos exterminavit."

"Tormenta," etc. A Pharaone, ubicunque scilicet essent. Vel, non tam hi quos Israelitae recenti clade per singulas civitates peremerunt, puniti sunt; sed et omnes Chananaei audientes victoriam populi Dei; unde Raab dicit: "Irruit in nos terror vester", etc. Mystice autem, Judaei, qui incarnationem Filii Dei, et praedicationem despiciebant, ubique terrarum vagi, et pro fugi variis cladibus affliguntur. Gentiles vero ad fidem conversi, et suscipientes paternam correctionem a Dei misericordia non recedunt: ut qui fuerant in capite, sint in cauda, et e converso.

"Duplex," etc. Praeteritorum malorum recordatio non minuitur, et praesentium tempestas augetur. Unde nec habent spem remedii, quia poenitentiam simulantes, non student emendationi; unde: "Cum occideret eos, quaerebant eum, et dilexerunt eum", etc.

"Non similiter justis," etc. Quia non similiter peccant. Septies enim cadit justus, et resurgit: impius autem, cum in profundum venerit malorum, contemnit.

"Quod quidam errantes," etc. RAB. " Dignum fuit, etc., usque ad tota enim intentio est eorum genus humanum persequi, et cruciare id omnibus modis."

"Sed omnia in mensura," etc. RAB. " Quia omnia secundum veritatem, etc., usque ad quando illuminabuntur abscondita tenebrarum, et revelabuntur consilia cordium."

"Momentum staterae," etc. Simile dicit Isaias: "Ecce gentes sicut stilla situlae, et quasi momentum staterae repulatae sunt" ; vult enim intelligi, quod mens, et ratio, et sensus Domini, per quem omnia facta sunt, et sine quo factum est nihil, ille sit de quo dicitur: "Verbo Domini coeli firmati sunt", etc. "Omnes gentes quae non cognoverunt creatorem suum," ad comparationem Dei "quasi stilla situlae sunt, et quasi momentum staterae" quod leviter declinatur, "et sicut gutta roris antelucani", quae primo aspectusolis siccatur. Vel sicut situlae stilla, si fluit a portante despicitur, vel negligitur: ita gentium multitudo coelesti splendori, supernis mysteriis, et angelorum multitudini comparata, pro nihilo ducitur.

"Diligis enim," etc. Bonus opifex, et opus suum diligit et regit: et si homo aliquando peccat, sustinet in multa patientia, et per poenitentiam in melius convertit. Unde: "Solem suum facit oriri super bonos et malos, et pluit super justos et injustos" ; impoenitentes autem justo judicio damnantur: "Justus enim Dominus, et justitias dilexit".