"Aqua sapientiae." RAB. "gratia Spiritus sancti: unde, "Qui biberit aquam quam ego dabo vobis, fiet in eo fons aquae salientis in vitam aeternam", id est non cedet persecutioni, vel haereticae pravitati."
Versus 5
"Et in medio Ecclesiae." Apostolos, praedicatores Evangelii significat, quos Dei sapientia, id est Christus, Ecclesiae praeposuit.
Versus 7
"Homines stulti," etc. Pagani, et idololatrae et Judaei, qui crucifigunt Filium Dei, sequentes umbram legis, et respuentes veritatem Evangelii: vel haeretici, qui Scripturas pervertunt.
Versus 8
"Et viri veraces." Omnis qui est ex veritate, audit vocem meam.
Versus 9
"In ore peccatoris." Haereticorum, qui doctrinam Patrum despiciunt, et simplices decipiunt. Donum largitatis non invidet Deus alicui, qui vult omnes homines salvos fieri.
Versus 12
"Non dicas." ID. "Non sunt mala nostra Deo imputanda, cui non sunt necessaria: "Deus intentator malorum est"."
Versus 14
"Constituit hominem" ad imaginem et similitudinem suam, et liberum arbitrium dedit ei.
Versus 16
"Si volueris." Id est si volueris implere opera et mandata Dei, habebis consolationem: si contempseris gehennae ardorem.
Versus 19
"Quoniam multa sapientia." ID. " Nullus potest praescientiam Dei, etc., usque ad nihil faciat homo, nisi quod dignum sit conspectui divino."
Versus 21
"Nemini mandavit." Non est auctor Deus peccandi, nec spatium concedit in quo homo impune peccare possit; semper bona praecipit, et mala interdicit. Solummodo placet ei quod bonum est, infidelitas autem et inutilitas displicet, "quoniam justus Deus, et justitias dilexit."
