Caput 18

"Qui vivit in aeternum." RAB. " Rerum substantia simul creata est, etc., usque ad magnitudinem virtutis scire vel enarrare: unde, "Nemo novit Filium nisi Pater, neque Patrem quis novit nisi Filius, et cui voluerit Filius revelare"."

"Non est minuere." ID. "Nihil de Scripturis sanctis est minuendum, nihil addendum: unde, "Si quis apposuerit ad haec, apponet super illum Deus plagas scriptas in libro isto", etc."

"Centum anni." ID. "Paucitatem dierum nostrorum comparat guttae maris, et calculo arenae: quia ad comparationem aeternae felicitatis nimia est brevitas, et miseria maxima: unde, "Homo natus de muliere, brevi vivens tempore, repletur multis miseriis"."

"Miseratio hominis." Pauci sunt, qui misereantur proximo: cum misericordia Dei redundat per universum mundum, qui solem suum facit oriri super bonos et malos.

"Excipiens doctrinam." Hortatur eos qui doctrinam Evangelii accipiunt, ut misericordiam proximis impendant: et festinent diem judicii misericordiae operibus praevenire; unde: "Beati misericordes, quoniam ipsi misericordiam consequentur".

"Verbi mali." Lingua eucharis gratiosum hominem facit; unde: "Qui moderatur sermones suos doctus et prudens est".

"Nonne ardorem." Segetes defendit ros ab ardore solis: et verbum bonum largientem a nequitia irascentis; unde: "Sermo durus suscitat rixas, lenis mitigat suscitatas".

"Stultus acriter improperabit." RAB. " In ore stulti jurgia, etc., usque ad polluunt verbo mendaci."

"Para justitiam." Ut videas quid in te Deo placeat vel displaceat, et delicta corrigas.

"Ante judicium." RAB. "Haec monent ut semper parati simus, nec stulta securitate nobis blandiamur: sed in Dei servitute laboremus usque ad finem vitae."

"Ante orationem." Cum stabis ad orandum, dimitte si quid habeas adversus aliquem.

"Memento." Unde: "Justus Dominus, et justitias dilexit: aequitatem vidit vultus ejus".

"Paupertatis." Futurae post hanc vitam, ut facias amicos qui recipiant te in aeterna tabernacula.

"Haec omnia." Ver, aestas, autumnus, hiems, dies et nox, nunquam omnia requiescunt; et tamen omnia aeternitati comparata cito transeunt: et omnia coram oculis Domini certo fine clauduntur. Ipse autem semper idem est, et anni ejus non deficient.

"Homo sapiens." Beatus est homo qui semper est pavidus ut a peccatis suis caveat, et praecepta Domini impleat: Quia "initium sapientiae timor Domini. Intellectus bonus omnibus facientibus eum".

"Invenienti." Id est, cum invenerit, et agnitionem ejus perceperit, ipsa dabit confessionem rectae praedicationis, et studium bonae operationis.

"Sensati." Quasi astuti agnoscunt sapientiam, et sensati in verbis opere demonstrant prudentiam.

"Ne fueris mediocris." Provocat nos ad opera misericordiae. Si enim pigri fuerimus, non modo deerunt nobis solatia temporalia, imo animae nostrae bona futura: quando temporalis eleemosyna remunerabitur mercede aeterna.