Caput 23

"Domine pater." RAB. "Quasi: Tuo munere defendar a voragine vitiorum."

"Quis superponet." Desiderat in cogitatu suo flagella disciplinae, et in corde doctrinam sapientiae: ne forte per ignorantiam non agnoscat delictorum pericula, et multiplicentur ei crimina, pro quibus cadat in manus adversariorum.

"In vanitate." ID. "Quia illam praeponit amori Dei et desiderio aeternae beatitudinis."

"Jurationi," etc. Vetat juramentum, ne fiat perjurium; unde: "Nolite jurare, neque per coelum neque per terram".

"Dupliciter." ID. "Quia per simulationem celat veritatem, et alios per falsitatem mittit in errorem."

"Est alia loquela." Blasphemia, quae supradictis pejor est: unde oportet ut non inveniatur "in haereditate Jacob," id est, populo Ecclesiae, qui supplantat vitia, et in virtutibus servit Deo.

"Indisciplinatae." Quasi: Disciplinam ne deseras, et indisciplinato ore sermones tuos ne proferas.

"Anima callida." ID. " Haeretici et schismatici ardentem animam habent, etc., usque ad sed virum priorem relinquentes, cum idolis fornicati sunt."

"Tenebrae circumdant." ID. " Qui castitatis virtutem perdit, etc., usque ad cum vultus Domini sit super facientes mala."

"Oculi Domini." Quia illi nihil praeteritum, et nihil futurum est: omnia praesentia sunt.

"Hic in plateis." Adulter libidinosus, de quo superius dictum est, qui quasi equus et mulus lasciviendo discurrit per latam et spatiosam viam, quae ducit ad mortem.

"Sic et mulier." Aequaliter et in viro et in femina damnatur adulterium, et germen hujus copulae abominabile est Deo. Mystice autem haereticorum Synagoga, vel anima haeretica pravitate decepta, abominabilis est Deo, quia relinquit virum priorem, qui sibi eam in baptismate copulavit, et ornamento virtutum decoravit.

"Haec in Ecclesia." Quia ejus perversitas in conventu fidelium, per solertiam doctorum declaratur.

"Et rami." Quia secta illius fundamentum veritatis non habet, fructum bonorum operum gignere non potest.

"Longitudo," etc. Quia in aeterna beatitudine in aeternum permanebunt qui sequuntur Deum.