Caput 29

"Donec accipiant." RAB. "Hujusmodi morbum melius curat timor Dei. Qui enim Deum quasi semper praesentem pertimescit, neminem fraudare intendit."

"Multis," etc. ID. "Illos notat, qui neminem laedere volunt, sed prae timore periturarum rerum prodesse nolunt. Contra quos dicitur: "Nolite thesaurizare vobis thesauros in terra"."

"Propter mandatum." Omnibus indigentibus misericordia est facienda, nec pro avaritia charitas proximi amittenda.

"Et non abscondas." Qui enim viderit fratrem suum necesse habere, et clauserit viscera sua ab eo, quomodo charitas Dei manet in eo?

"Super scutum potentis," etc. Magis valet eleemosyna contra jacula inimici, quam arma terrena: quia haec dubiam, illa certissimam parit victoriam, ut absorbeatur mors in victoria.

"Qui perdiderit," etc. Id est, qui unitatem fidei, et sinceritatem legis non custodit, sed implicatur erroribus variis.

"Gratiam fidejussoris," etc. Doctorem scilicet qui pro fide et bonis operibus promittit vitam aeternam. Haec sententia Pelagium reprehendit qui liberum arbitrium gratiae praeponit, cum per solam gratiam liberentur electi.

"Recupera proximum." Consulit, ut secundum vires proximo praebeas solatium, et sic tibi praevideas, ne in laqueum cadas.

"Initium vitae," etc. RAB. " Fragilitatem, et hospitalitatem et honestatem docet, etc.,usque ad et Dominus primis parentibus pelliceas tunicas post peccatum fecit."

"Melior est victus pauperis," etc. Ad litteram. Melius est tenuem victum sub vili tugurio sumere in securitate, quam splendidas epulas cum fatigatione in incertis locis quaerere.

ID. " Allegorice. Melior est victus, etc., usque ad ubi labor et superflua cura."

"Minimum." ID. " Sufficiat tibi quod habes, etc., usque ad melius est nomen bonum quam deliciae multae."

"Transi." Quasi: Qui alieno delectaris hospitio, redi ad propria, et de labore tuo te et alios pasce. Noli de aliena domo pastum tibi superfluum quaerere. Sufficit tibi susceptio proximorum.

"Improperium." RAB. " Mystice autem monetur vir ecclesiasticus, etc., usque ad in futuro autem examine aeternum confusionis improperium sustineat."