Caput 3

"Judicium patris." Dei, "ex quo omnis paternitas in coelo et in terra." Quia ex ipsa sunt omnia. Qui diligit ea, quae fecit, et ut in eo maneant, quo facta sunt, cujus judicium, qui audierit, et praecepta ejus fecerit, salvus erit: cujus mandatum est, ut etiam patri temporali, et matri reverentia exhibeatur; unde: "Honora patrem tuum", etc.; unde sequitur: "Qui honorat patrem suum." Cui Deum honorem constituit, non debet a filiis inhonorari: quia Deus judicio suo exquiret qualiter praeceptum suum servetur.

"Qui diligit." Qui scilicet mandata servat, et abstinet a peccatis, et tamen pro excessoribus orare non desinit, quia scit misericordem judicem omni tempore preces exaudire.

"In filiis." RAB. " In sobole vel in discipulis, etc., usque ad honorare parentes primum mandatum est in promissione."

"In opere et sermone," non in vulva scilicet unde ostenditur, et spiritualis pater maxime dignus honore; unde Paulus: "Per Evangelium ego vos genui". Et alibi: "Qui bene praesunt presbyteri, duplici honore digni habeantur, maxime qui laborant in doctrina et verbo".

"Benedictio patris," etc. RAB. " Benedixerunt patriarchae filiis, etc., usque ad illusores saevissime laniaverunt."

"Eleemosyna." Scilicet quae peccatum delet. Hostia enim quae pro peccato, peccatum vocatur. Qui autem parentibus, vel caeteris pauperibus miseretur, justitiae praemium recipiet a peccatis absolutus. "Beati misericordes, quoniam", etc. Et alibi: "Feneratur Domino, qui miseretur pauperis.". Hinc Daniel ad Nabuchodonosor: "Consilium meum, o rex, placeat tibi: peccata tua eleemosynis redime, et iniquitates tuas misericordiis pauperum", si forsitan ignoscat Deus delictis tuis. Hinc Dominus ait: "Date eleemosynam, et omnia munda sunt vobis".

"Fili in mansuetudine." Mansuetudo et humilitas gratiam, superbia et furor pariunt ruinam; unde: "Discite a me, quia mitis sum et humilis corde", etc. Et alibi: "Qui se exaltat, humiliabitur", etc.

"Quanto magnus es," etc. RAB. " Docuit superius mansuetudinem, etc., usque ad sufficit homini ea pie cogitare, et opere implere, quae praecepit Deus."

"In supervacuis rebus," etc. RAB. " Id est, ne scruteris supervacue, etc., usque ad disputantes in errores incidunt, et a veritate recedunt."

"Cor durum." Quia "secundum duritiam tuam thesaurizas tibi iram in die judicii".

"Cor ingrediens." Quod non curat, nec studet vitare, et quod ea diligit, quae ducunt ad interitum, ut haereses et profanae novitates; unde sequitur: "Cor ingrediens duas vias, non habebit successus," etc.