I, P. 1, Inq. 1, Tract. 4, Q. 2, M. 3, c. 2

Deinde quaeritur utrum potuerit res meliori modo facere.

Ad quod obicitur 1. secundum Hugonem, in suis Sententiis: "Quidquid facit Deus, si melius potest facere quam facit, in hoc ipso non bene facit quod non optime facit quod facit: facere quippe et nolle melius facere quod bonum etiam estfacienti, male est facere; sed haec pia mens in Deum dici non sustinet; ergo nonpotest facere meliori modo quamfacit".

Contra: a. Si non potest facere meliori modo quam facit, ergo limitata est eius potentia: quod falsum est.

Respondeo: Melior modus potest intelligi ex parte facientis: et sic non potest facere meliori modo quam facit, hoc est meliori sapientia, meliori bonitate, meliori potentia, quia sua sapientia, bonitate, potentia, quae ipse est, facit omnia. Si vero modus intelligatur ex parte rei factae: potest meliori modo facere, hoc est ut res sit in meliori modo quam sit, potest facere

[Ad obiecta]: 1. Ad illud ergo quod obicit Hugo, respondendum per interemptionem: "Quidquid facit, si melius" etc.; illud enim teneret ubi est debitum operationis in agente, sed ipse agens summus nec debet opus nec aliquid debet operi; Anselmus: "Deus nulli quidquam debet". Praeterea, optime, quantum est de se, facit semper, etsi non optime quantum ex parte creaturae.