IIa-IIae, Inq. 3, Tract. 8, S. 1, Q. 3, T. 1, C. 8

Octavo quaeritur de oppositione hypocrisis, et quaeritur cui virtuti opponatur.

Et videtur quod opponatur generaliter omnibus. 1. Hypocrita enim vult videri castus, cum non sit, et ita opponitur castitati; similiter vult videri sobrius, cum non sit, et ita opponitur sobrietati, et sic de aliis virtutibus; ergo est peccatum oppositum omnibus virtutibus.

Contra. a. Est speciale peccatum; et speciale peccatum habet specialem virtutem sibi oppositam; ergo opponitur alicui virtuti specialiter.

b. Item, capitale vitium, quod est inanis gloria, et similiter alia capitalia habent virtutes sibi oppositas ; ergo et ipsa hypocrisis, quae nascitur ex inani gloria, habebit virtutem sibi specialiter oppositam.

c. Item, alia nascentia ab inani gloria, sicut inobedientia, iactantia, habent virtutes sibi oppositas; ergo et hypocrisis pari ratione.

[Solutio]: 1. Ad quod responderi potest quod hypocrisis, in quantum habet duplicitatem, prout dicitur Eccli. 2, 14: "Vae duplici corde", opponitur simplicitati veritatis ; per quamdam tamen concomitantiam opponitur omni virtuti: quod enim opponitur bonitati perfectae, oppositionem quamdam habet ad speciales virtutes.