Quaestio 42
Quaestio 42
Articulus 1
IN primo articulo quaestionis quadragesimaesecundae, in n ad ultimum, adverte quod Auctor dicit schisma et seditionem contineri sub discordia, inter vitia numerata a beato Gregorio in XXXI Moral.: et propterea oriri ex superbia seu inani gloria, ex qua oritur discordia. Et verificatur continentia haec secundum actum interiorem: nam tam seditio quam schisma, secundum. actum interiorem, discordia quaedam est, scilicet partium multitudinis, etc.
Articulus 2
IN articulo secundo eiusdem quaestionis, in responsione ad tertium, adverte quod excitatio contra tyrannum tunc ex eventu peiore illicita iudicatur quando inordinate perturbatur tyranni regimen. Quis sit autem modus ordinatus perturbandi tyrannum; et qualem tyrannum, puta secundum regimen tantum, vel secundum regimen et titulum; non est praesentis intentionis. Sat est nunc quod utrumque tyrannum licet ordinate perturbare; absque seditione, quandoque: illum, ut bono reipublicae vacet; istum, ut expellatur.
II. In calce harum quaestionum de vitiis oppositis paci, adverte ordinem. Post discordiam in corde et contentionem in ore, quatuor vitia in opere ordinata videntur ab Auctore hic secundum maiorem extensionem. Nam schisma respectu Ecclesiae universalis, quae orbem comprehendit; bellum ad diversa regna, nationes, etc.; rixa ad personas undecumque; seditio ad partes unius multitudinis se extendit.
