Titulus 40

Imperator Antoninus Non tibi obest, si, cum incola esses, aliquod munus suscepisti, modo si ante, quam ad alios honores vocareris, domicilium transtulisti. * ANT. A. PAULINO. *<A XXX >

Imperator Alexander Severus Nec ipsi, qui studiorum causa aliquo loci morantur, domicilium ibi habere creduntur, nisi decem annis transactis eo loci sedes sibi constituerunt, secundum epistulam divi Hadriani, nec pater, qui propter filium studentem frequentius ad eum commeat.

Sed si aliis rationibus domicilium in splendidissima civitate Laodicenorum habere probatus fueris, Mendacium, quo minus muneribus fungaris, non proderit. * ALEX. A. CRISPO. *<A XXX >

Imperatores Diocletianus, Maximianus Est verum eos, qui in territorio alicuius civitatis commorantur, velut incolas ad subeunda munera vel capiendos honores non adstringi. * DIOCL. ET MAXIM. AA. ALEXANDRO. *<A XXX >

Imperatores Diocletianus, Maximianus Cum neque originales neque incolas vos esse memoratis, ob solam domus sive possessionis, licet ex substantia decurionis adquisita sit, causam publici iuris auctoritas muneribus subiugari vos non sinet. * DIOCL. ET MAXIM. AA. ALEXANDRO. *<A XXX >

Imperatores Diocletianus, Maximianus Si in patria uxoris tuae vel in qualibet alia domicilium defixisti, incolatus iure ultro te eiusdem civitatis muneribus obligasti. * DIOCL. ET MAXIM. AA. MAXIMO. *<A XXX >

Imperatores Diocletianus, Maximianus Privilegio speciali civitatis non interveniente tantum originis ratione ac domicilii voluntate ad munera civilia quemque vocari certissimum est. * DIOCL. ET MAXIM. AA. ET CC. MARCELLO. *<A XXX >

Imperatores Diocletianus, Maximianus Cives quidem origo manumissio adlectio adoptio, incolas vero, sicut et divus hadrianus edicto suo manifestissime declaravit, domicilium facit.

Et in eodem loco singulos habere domicilium non ambigitur, ubi quis larem rerumque ac fortunarum suarum summam constituit, unde rursus non sit discessurus, si nihil avocet, unde cum profectus est, peregrinari videtur, quo si rediit, peregrinari iam destitit. * DIOCL. ET MAXIM. AA. ET CC. AURELIO. *<A XXX >

Imperatores Valentinianus, Theodosius, Arcadius Senatores in sacratissima urbe domicilium dignitatis habere videntur. * VALENTIN. THEODOS. ET ARCAD. AAA. . . . PRAEF. AUGUSTALI.*<A 390 D. K. MART. VALENTINIANO A. ET NEOTERIO CONSS.>

Imperatores Valentinianus, Theodosius, Arcadius Mulieres honore maritorum erigimus et genere nobilitamus et forum ex eorum persona statuimus et domicilia mutamus.

Sin autem minoris ordinis virum postea sortitae fuerint, priore dignitate privatae posterioris mariti sequantur condicionem. * VALENTIN. THEODOS. ET ARCAD. AAA. MARTINIANO COM. ORIENTIS. *<A 392 D. IIII ID. NOV. CONSTANTINOPOLI ARCADIO A. II ET RUFINO CONSS.>