Praeambulum

Ad intelligentiam huius partis secundum duo, quae Magister determinat in littera, incidit hic quaestio circa duo principaliter. Primo quaeritur, a quo sit malum tamquam ab originali principio. Secundo, in quo sit tamquam in subiecto. Circa primum quaeruntur tria. Primo quaeritur, utrum malum sit a bono vel a malo. Secundo, utrum sit a bono ut efficiente vel deficiente. Tertio, utrum sit ab intentione vel praeter intentionem.