Caput 27

"Viginti quinque annorum erat Joatham," etc. In principio et in fine, annos Joatham enumerat, quia sicut justitia coepit, usque ad finem perseveravit. Unde tempora vitae ejus laude digna praedicantur.

"Ipse aedificavit portam," etc. Quae in Actibus apostolorum dicitur Speciosa, secundum Hebraeos et ab eis porta Joatham (quia ipse aedificavit eam) usque hodie nuncupatur.

"Ophel." Turris erat non longe a templo, mirae altitudinis. Unde et Ophel, id est, tenebrarum vel nubili nomen accepit. Ubi autem in Michaea scriptum est: "Et turris gregis nebulosa filiae Sion": In Hebraeo habetur, "turris Ophel." Turris Ophel eminentiam Scripturae significat, quae in historia fundata spiritualis sensus caput inter nubila condit, dum scientiae magnitudinem ab oculis hominum abscondit. Unde: "Posuit tenebras latibulum suum". Joatham, cujus vita laudatur, Christum significat, de quo dicitur: "Magnus Dominus et laudabilis nimis", etc. Interpretatur enim Joatham consummatus vel perfectus, et de Christo dicit Apostolus: "Et consummatus, factus est omnibus obtemperantibus sibi causa salutis aeternae," etc.. Ipse construxit portam domus Domini excelsam, et mysterium suae incarnationis mirabili potentia effecit, qui de se ait: "Ego sum ostium. Per me si quis introierit, salvabitur". Haec porta excelsa vocabatur, de qua Psalmista ait: "Excelsus super omnes gentes Dominus", etc.