Caput 18

"Et filias." RAB. " Minores civitates ad metropolim pertinentes, etc., usque ad et caro cogitur servire spiritui."

"Adarezer." Qui interpretatur decorum auxilium; rex Soba, qui interpretatur incensa vel convertens, significat gentilitatis vitia naturali fervore accensa: contra quae Christus confligit et vincit "gladio spiritus, quod est verbum Dei".

"Subnervavitque." Subnervat Christus repugnantem sibi superbam mundi altitudinem humanae sapientiae; quod tamen opportunum et aptum praedicationi reperit, reservat sibi.

"In Damasco." Damascus nobilis civitas Phaenicis, sanguinis poculum interpretatur. Syria "sublimis" vel "humecta." Gentilitas enim, prius libidine fluida et spiritu superba, sanguinem humanum sitiebat: nunc baptismate Christi mundata, profectu virtutum exaltata, sanguinis ejus poculum desiderat.

"Pharetras." Dogmata gentilium quibus disciplinae liberales continentur, quas Christus a gentilitate abstulit et in servitium Ecclesiae convertit: prosunt enim ad expugnationem erroris et confirmationem veritatis.

"Salomon." Quia ergo rex noster pacificus, vetustatem elocutionis de humilitate eversae gentilitatis ad emundandam gratiam baptismi et firmamentum fidei per praedicationem pii dogmatis in usum Ecclesiae convertit. Tebath enim interpretatur parvulus venit, et Chun pulchritudo. Qui enim parvulum se agnoscit, pulcher et speciosus in decore virtutum efficitur.

"In valle Salinarum." In Regum ita scriptum est: "Fecit sibi David nomen cum reverteretur capta Syria in valle Salinarum, caesis decem et octo millibus", quia, scilicet, erexit sibi fornicem triumphalem: fecit etiam sibi nomen, quia victa Syria Damasci et Syna Sobal, alterum erexisse dicitur.

"Decem." In quibusdam autem codicibus invenitur David non viginti et octo millia in valle Salinarum occidisse, quod vitio scriptorum factum est. Joab vero duodecim millia prostravit, sicut in titulo quinquagesimi septimi psalmi scribitur. Hic autem decem et octo Abisai interfecisse perhibetur, sed pro dignitate regia ascripta est David victoria. Et quia Christus examinis sui districtione in his qui de eo prava sentiunt, stultitiam immoderati saporis exstinguit, unde: "Qui vertit linguam suam, incidit in malum".

"Achimelech." Id est, frater meus rex: qui in Regum Abimelech, id est, pater meus rex, Ecclesiae sacerdotes instruit, ut qui per ordinem dignitatis, patris tenent locum, per humilitatem fratres censeantur, et non dominentur in clero.

"Phelethi." HIERON. "Admirabiles vel vivificatores, quos quidam dicunt fuisse septuaginta judices, more eorum quos Moyses Domino praecipiente in eremo elegit. Alii dicunt Cerethaeos ad hoc deputatos ut reos punirent, Phelethaeos vero ut insontes defenderent."

"Porro." Filii David, Christi sunt fideles, quos ei sancta parit Ecclesia, qui sunt "genus electum, regale sacerdotium".

"Primi ad manum." Quia bonis operibus merentur sibi regnum coeli, tanto Deo viciniores, quanto sanctiores.