Caput 5

"Virgam auream." Regiminis potentiam vel passionis crucem, per quam acquisivit potestatem, de qua dicitur: "Data est mihi omnis potestas in coelo et in terra ." Et alibi: "Propter quod exaltavit illum, et dedit illi nomen quod est super omne nomen ."

"Si inveni in conspectu." Dilatio petendi non deputatur segnitiei, sed patientiae. Non enim in praesenti sed in futuro bonis et malis retribuetur merces: cras enim pro futuro ponitur, unde: "Nolite solliciti esse de crastino;" et Jacob in Genesi ait: "Apparebit mihi cras justitia mea ." Et de agno dicitur: "Non remanebit ex eo quidquam usque mane ." Cum judicium venerit, revelabitur quali veste quisquam ad convivium intraverit.