Caput 8

"In tempore illo," etc. HIER. "Omnia quae prophetalis sermo describit, etc., "uque ad"aurum et argentum quae in sepulcris more antiquo ponebantur."

"Et dices." Post tanta mala ad poenitentiam provocat eos qui remanserunt. Sive, priusquam veniant, quae minatus est, hortatur ad conversionem, et poenitentiae locum indicat.

"Aversus est," sive "avertit." Quasi dicat: Conversus potest irae Dei precibus resistere et avertere.

"Quare ergo," etc. HIER. "Quanto eos ad poenitentiam provocavi, tanto magis recesserunt, non tam studio peccandi, quam me superandi."

"Nemo quod bonum," etc. "Omne g enus hominum pronum est ad malum" ID.. In tempore Salvatoris, "omnes declinaverunt, simul inutiles facti sunt, non est qui faciat bonum". Unde ipse: "Salvum me fac, Domine, quoniam defecit sanctus". Ubi sunt ergo qui dicunt in nostra positum potestate omni peccato carere?

"Milvus in coelo." ID. "Quasi dicat: Etiam aves sua norunt tempora, ut sciant quando ad calida festinantes loca rigorem hyemis declinare debeant, et veris principio ad solitas redire regiones."

"Propterea dabo." ID. "Receperunt mercedem suam, et qui verbum Domini abjecerunt, ipsi abjecti sunt."

"Et sanabant contritionem." ID. " Quasi dicat: Boni medici aliena vulnera verbis sanare cupiebant, etc., usque ad et ignominiam eorum qui decipiunt dicentes, pax, pax, etc."

"Idcirco cadent." ID. "Ut quorum dignitas excellebat, etiam ruinae populi misceantur, quia scilicet "a minimo usque ad maximum omnes avaritiae student"."

"Non est uva," etc. Quasi dicat: Cum tempora praetereant, et aestati succedat autumnus, et hyeme arborum cadant folia: de longe cuncta videbitis nec ex eis cibum capietis.

"Quare sedemus." Vox populi inducitur respondentis, et vitia sua confitentis, et sese mutuo cohortantis.

"Convenite et ingrediamur civitatem munitam." Vel unam civitatem Jerusalem: jam enim aliae captae fuerant.

"A Dan auditus est." Ubi Jordanis fluvius oritur: Nabuchodonosor describitur a Dan veniens per Phoenicem cum exercitu suo.

"Mittam vobis serpentes." ID. " Ut insanabiliter percutiant vos, etc., usque ad qui eloquia Domini contemnunt traduntur adversariis potestatibus."

"Dolor meus." ID. "Ex persona Domini haec legenda, eversionem Jerusalem plangentis, et ejus miseriam non ferentis."

"Et ecce vox." Describit fletum et ululatum urbis ingressis hostibus. Hostes venientes de terra longinqua clamant contra civitatem vel cives contra hostes.

"Transiit messis." Verba populi in Jerusalem longa obsidione conclusi, quia mutata sunt tempora, anni circulus revolutus. Spes autem nostra irrita.

"Super contritione." Domini responsio, qui in afflictione Jerusalem videtur afflictus.