Praeambula, Problema 2, Quaestio 13

Terciadecima questio est quomodo differenter determinatur de morte et uita in Medicina et in Astrologia et in libro Mortis et uite et De anima, unde dicitur quod uiuere in uiuentibus est ab anima uegetabili.

Solutio. Dicendum est quod multipliciter est loqui de morte et uita: uno modo secundum quod sunt operationes fluentes ab anima uegetabili per sui presentiam et absentiam, et sic determinatur de illis in libro De anima, ubi dicitur quod uiuere est in uiuentibus ab anima uegetali. Secundo modo est loqui de his a parte causarum quas habent in corpore et a parte dispositionum corporis, et sic de illis determinatur in libro Mortis et uite. Tercio modo est loqui de illis a parte illa qua habent causam a corporibus superioribus secundum diuersitatem illorum situum et influentiam secundum quod his inferioribus tardatur plus uita uel minus, et sic in Astrologia determinatur de illis. Quarto modo est loqui de illis a parte illa qua uita recipit regimen in corpore per exhibitionem ciborum et auxilium et per exhibitionem medicine, ut possit uita diu conseruari per exhibitionem eorum, et sic determinatur de illis in Medicina.