An daemones, semel victi a sanctis, ultra accedant ad alios.
Aliis quoque, qui a sanctis iuste et pudice viventibus vincuntur,
potestas alios tentandi videtur adimi.
Unde Origines: "Puto, inquit, sane, quia sancti, repugnantes
adversus istos incentores et vincentes, minuant exercitum
daemonum, velut quam plurimos eorum interimant; nec ultra
fas sit illi spiritu, qui ab aliquo sancto caste et pudice vivendo
victus est, iterum impugnare alium hominem."
Hoc autem putant quidam intelligendum tantum de illo vitio,
in quo superatus est, ut, si de superbia aliquem virum sanctum
tentat et vincitur, ulterius non liceat ei illum vel alium de superbia
tentare.
