Capitulum 4

Furiosi quoque, dum in amentia sunt, matrimonium contrahere non valent.

Unde Fabianus Papa: "Neque furiosus neque furiosa matrimonium contrahere possunt; sed si contractum fuerit, non separentur".

Item Nicolaus: "Hi qui matrimonium sani contraxerunt, et uni ex duobus, vel ambobus amentia vel furor vel aliqua infirmitas accesserit, ob hanc infirmitatem talium coniugia solvi non possunt. Similiter etiam sciendum est de his qui ab adversariis excaecantur, vel membris truncantur, vel a barbaris exsecti fuerint".